ЕАМ-120/2450, OT 444, 1984-12-10

Заради што поцелисходно етнографско мапирање на свадбениот обреден циклус му е посветено посебно место со 4 главни истражувачки прашања, кои се развиени во посебни корпуси специфични истражувачки прашања со цел да се расветлат сите фази од свадбената обредност. Во овој том се поместени материјалите од истражувачкото прашање број 120, кое се однесува на женидбените обичаи до свадбата. Во основа станува збор за претсвадбениот обреден циклус, кој ги опфаќа сегментите на евентуалното распрашување за состојбата во семејствата на идните младенци, процесот на стројникување, кој, ако се имаат предвид теренските белешки, бил речиси неодминлива форма на формализирање на сватовската врска помеѓу двете семејства, дури и кога младите веќе се познавале или имале врска. Тука се изнесени многу подробности во врска со идните средби и договарања помеѓу сватовите, низ кои може да се следат фазите на етапно градење на сватовските односи и вмрежувањето на семејствата. Од материјалите може, исто така, да се забележи дека свадбата како чин, освен семеен карактер, многу повеќе има пошироко општествено значење, не само поради сватовското поврзување на семејствата туку и за пошироката селска заедница.